Laithil Min Cawnnak Part I

Laithil Min Cawnnak Part I

Hlan lio Laimi nih rak hmanh tuk mi thil hna hi chanthar ahcun an mui hmuh awk zong an har ngai cang, cun a min cu an chim theu tawn ko nain zeiset asi timi zong a lungfiang lo mi tampi kan um theu lai dah. Cu caah tlawmpal tete in tenh piak chih khawh kan zuam hna lai..

1.. BukBau

Bukbau hi chanthar holh cun Thingkuang asi loah Bizu ti zong in auh khawh asi. A ruang cu hlan chan ah bizu le thingkuang a rak um lo tik ah an thilpuan hna chiahnak ah tiah bukbau hi an rak hman mi kha asi.

Atu ahcun bukbau mui hmuh awk hi a har ngai cang mi kha asi.

2.. Khette

Khette hi Rua in asi lo ah Hripi (thithat) in tah mi asi i a fek ngaingai mi kha asi. Thil hme tuai deuh chiahnak ah rak hmanh mi asi. A hlei lak le hman colh ding pawl kha an rak chiahnak asi.

Khette zong hi atu chan ahcun hman asi ti lo tik ah a mui hmuh a har ngai cangmi kha asi ve.

3.. Nurel (darawn)

Nurel (darawn) hi cu facang zun tik ah a hlei in hman khun mi kha an si. Cun atu chan bantuk in facang chiahnak Tin tibantuk a um lo tik ah facang chumhchuan dingmi chiahnak ah an rak hman mi kha asi. Nurel tu hi cu hmuh awk cu a um pah lengmang ko rih.

4.. Pher

Pher hi Rua asi lo ah Ruangal in tahmi asi i facang pho nak ah rak hman mi kha asi. Chanthar ahcun sirpalin (muka) a chuah cang tik ah a tongh tham zong a fawi zang cu caah pher hi cu hman tuk asi ti lo.

Atu kan chan ahcun hmuh awk a har ngaingai ve cang.

5..Sum le Sumkhal

Hlan lio chan i facang le Kaawm (fangvoi) te hna rak phomhnak ah a hlei in hman mi asi. Cun sum ahhin cun a phunphun phomh awk tha mi paoh phomh khawh asi ko nain Facang phomhnak tu ah rak hmanh deuh mi asi.

Atu chan ahcun a mui hmuh awk a har ngai ve cang. A ruang cu facang rialnak seh thatha hman cio asi tik ah sum in facang phomh mi cu an um ti lo ti awk asi.

Note: a dang zong peh than khawh kan rak zuam te lai.

Dohphit

 

Be the first to comment

Leave a Reply

Your email address will not be published.


*