A LU PHURTU AN UM MAW?

A LU PHURTU AN UM MAW?
—————————-

Pele vanva lolam sakhi nan kap maw?
A kah cu kan kah ko
A lu phurtu an um lo
A lu cu khur ah phum….

Image may contain: one or more people and sky

Salu cu a kaptu nih phurh phung, cucu kan Laiphung. 1999 tthal, B.Th kai kaa thawh lai te ah sakhi ka rak kah. Mi meithal in ka kah caah a vaang cu meithal sa ah a kal ko. Alu cu a kaptu keimah covo hrimhrim a si. Kan inn ah ka tlunpi. Sakap tawn a si bang, ka pa a rak i lawm tuk. Ttha tein a lu ka kheuh lai i kan innka cungah kan taar lai a ti. Dawhtein a kheuh, ro tuan seh tiah pokhlet ah a pho. Zaan kan ih kar ah uico nih a rak i tlik diam. Ka pa thinhun cu a mak. Sianginn kai ah kai thawh. Sianginn khar i ka rak tlun ah, kan innka cungah salu a rak i taar. Keimah kahmi sakhi lu, uiko eibang kha ka pa nih a hmuh i a rak tarmi a si. Ka pa cu a kan thihtak cang. Hi lei ah ka hmu tthan ti lai lo, nain a salu tarmi cu ka hmuh tthan te lai.

Image may contain: one or more people and sky

Laimi nih Miphun ni kan ngeihmi hi miphun dang nih an kan tuahpiakmi a si lo. Kanmah Laimi kan pupa kutchuak a si. Kan pupa hna kahmi a si. Mi nih khaan hawt piak chawm in an kahmi a si lo. Anmah ramvaihnak le salem tumnak in an kahmi a si. Cucaah an kahmi salu (Nengpi lu) – “Chin Miphun Ni” cu hmaingal ngai in, techin fapar chan hmun dingin pang ah an kan taarpiak. Ka sakhi kahmi lu uico nih aa tlik bang, kan nengpi lu (Chin Miphun Ni) cu Kawl pawl nih an fir i, anmah kahmi CENGHNGIA LU (Chin State Day) tu an kan taarpiak.

Image may contain: one or more people and sky

Kum zeizat remruam dah cenghngia lu (Chin State Day) kan i tar. Nizan tihni tiang pei an kan taarpiak ko kha. Kanmah kahmi Nengpi lu (Chin National Day) kha anmah tein maw an rak kan khirh tthan. Nemmam! Lai pa salttha, pa ralttha hna nih thisen tampi luan hnu ah an va chuhkhawh tthanmi hna si lo maw? Ziah Laiphung ah salu cu a kaptu nih phurh phung si lo maw? Ziah Kawlpa cu kan phurhter ne? Inn tiang a phur huam lai lo. Lampi ah a phum diam cang lai.

Image may contain: one or more people and sky

Kei hi upa, mifim bia ngaih le paih zoh ka huam. Hakha Bible sianginn ka kai chung vialte Chin State Day paih zoh ka hrelh lo. Kan camipuai lio a si tawn. CSD thaizing phit ding paoh hawihlan bik ah ka rak zoh zungzal. Paih zoh cu ka hrelh ballo, nain bia ngaih belte kum khat lawng ka ngaih huam. Ngaih awk a um lo. Zung rianttuan pawl report peek ni a lo. Zeitik hmanh ah lim an timh lomi Hakha le Thantlang lam kattaza phahnak report pawl khi.

Image may contain: one or more people and sky

Kum sau ngai Hakha i Miphun Ni ka hman lo hnu, 2016 ah ka va hmang tthan. Chin State Day (Cenghngia lu) kha Chin National Day (Nengpi Lu) nih a rak rolh. Zoh ah lung a hmui, tha a nuam, nain an caan hman ning tu cu ralkap chan lio bantuk khan NLD pawl report peek ni a lo ve. Cucaah Chin Miphun Ni hi a cozah nih tawlrel lo in Chin mipi nih tawlrel a hau hita timi ruahnak a ka ngeihter. Cuticun, mipi nih kan duhmi minung kha SALU kan phurhter khawh hna lai. A kaptu nih an phurh khawh lai.

Credit: Duh Tin Kep

Be the first to comment

Leave a Reply

Your email address will not be published.


*