Fung Zum Chuih

NIHIN CAAH THAWNGTHA

“FUNG ZUM CHUIH”

“Kan dihlak in vawlei ah kan tlu i Hebru holh in aw pakhat nih a ka chawnh kha ka theih i, ‘Saul, Saul, zeicadah na ka hrem? Fung zum chuih hi nangmah caah dah kaw a fah ko,’ tiah a ti [Lamkaltu 26:14].

 

Paul nih Lamkaltu 26:14 ah a lungthlennak kong a chim thanmi a si. ‘Fung zum chuih’ timi hi “Pathian nih Thlarau Thiang in lam an hruainak na doh ahcun na caah a fak lak lai” tinak a si. A zummi fung cu chuih sual ahcun mah le mah fak tuk in i khawnnak a si. Cu bantuk in, Pathian doh hi tihnung taktak a si ti hi Khrih nih Saul a auhnak in a lang. Paul [Saul] nih cun Pathian a doh. Pathian zumtu hna cu a doh hna. Khrihfabu a hrem ning hna hi a fak taktak [Lamkaltu 8:3]. Stephen kha lung in an cheh i an thah lio ah aa tel ve [Lamkaltu 7:58]. Khrih nih a kawh. “Fung zum chuih hi na caah dah kaw a fah ko” a ti [Lamkaltu 26:14].

Pathian nih Khrih in a kan auhnak cu Thlarau Thiang nih lungpemnak a kan pek [John 14:26]. Pathian duhnak hi kan zulh duh lo ahcun kanmah caah a faak. Kan caah ‘fung zum chuih’ bantuk a si ve. A diin le a fahning cu mah te cio in theih a si ko. Pathian Fapa Khrih zumh le cohlan cu nun nuamhnak a sinak cu zumtu paoh nih hngalh cio a si. A hngal rih lo mi kan tampi. Pathian nih Khrih in a kan auhnak hi zum lo in um hlah usih. Amah bochan hi daihnak le hnangamnak taktak a si.