Fa Le Hmai ah Nuva Ai Si Mi Cu- An Fa Le Kha Refugee An Sawk Ter Bantuk A Si

Laitlang ka tlawn lio ah ngakchia te nih volh pamhnak bia an chimmi tampi ka theih. Ngakchia nih cun bia tha lo cu khuai ka cun dah an va lak hnga. An nu le pa sin in an theih i an i cawn mi a si ko lai tiah kei nih cun ka ruah ko.

Ngakchia cu pawngkam le a hmaika i hmuh tonmi thil hna hi hmailei a nunnak lam hruaitu an si caah ngakchia hmai ah nu le pa i sik le vuak hi i ralrin a herh taktak mi a si. Ngakchia nih an hmaiah nu le pa an i sik le vuak an hmuh ahcun thil pakhat khat um tikah hi bantukin tuah phung a si rua tiah an ruah i midang cungah zangen duhnak lungthin an ngei colh. Cun nu le pa an i sik le vuak a hmu peng mi ngakchia cu inn ah an lungthin a him ti lo. An lungthin a him lo tikah anmah le anmah an i bochan nak zong a zor. Zei thil an tuah mi poah ah phuhrun bu te he an tuah i hnabei seimi zong an mithlam ah a cuang kho ti lo dirhmun in an thang lian. Ngakchia tham cu an upat deuh tikah an philh te ko lai tiah kan hei ruah sawh men lai. Ngakchia hi an lung a rak fim tuk. An memory zong a tha tuk. An philh nai sai lo.

Ngakchia hmai ah nu le pa an i sik ciammam ahcun ngakchia cu khuaka lei dah na tan lai tiah hramhram in duh thimter bantuk khi a si. A dirhmun a har tuk. Sianginn an va kainak zongah ca an lung a lut ti lo. An hawi le he lente an i celhnak tiangah nuamh loin an um. Inn zongah a leng zongah an lungthin a him ti lo. Him lo (insecure) timi hi bia fak ngai (strong word) a si. Refugee kan sawk mi hi kan him lo ruangah, kan nun him lo ruangah refugee ah a kan pom mi a si. Kan fa le hmai i kan i sik kan i velh ahcun Nu le pa nih kan fa le kha refugee dirhmun ah kan chiah ve hna bantuk a si. Zamnak an hngal lo sawh i a si ko.

Lai phungtluk ah “lei le ha hmanh ai seh” an ti maw. Ai si bal lo mi nuva chungkhar cu a um bal lai lo. Nain ngakchia hmuhlo nak nuva lawng um lio teah problem kha i ceih ding a si. Ngakchia cu ne la pa dawtnak thladem tangah lum tein an than a herh. A nuami chungkhar le a himmi inn ah an um awk a si.

Ngakchia Hmai I Sik Awk A UM TIK AH-

1.I sik awk a um timi cu thil pakhat khat kongah nan ruahnak ai khat lo caah a si i hrial awk a tha lo ti cu a fiang. Nain nan pawngah ngakchia an um ahcun chimh rih lo dingin nan i sum lai. Nan pahnih in nan min pum in auh le thang piin auh hnawh kha ngakchia hmaiah nan hrial lai.

2.Ngakchia nih nan nuva nan i sik mi an in hmuh sual hna ahcun, ngakchia nih an in mawhchiat hna nak hnga lo nan i sik hnu khan nan nuva in pakhat le pakhat kan i daw, kan upat thiam thiam ko timi kha nan langhter lai. Cu nih cun nu le pa hi a chelchel ahcun sik le bia al phung a si ko ti kha an lung a fian ter lai.

Note: Ka video le ka catial mi hi ka caah that hnemnak a um ko tiah na ruah ahcun Dr,Pari page hi Like in ka tanpi ve.

Crd: Dr.Pari

Be the first to comment

Leave a Reply

Your email address will not be published.


*