Zeiruangah??? (why-18: Huatnak)

Zeiruangah??? (why-18: Huatnak)

​Minung kan sinak i kan thluachuah rel tik ahhin dawtnak kan ngeih khawhmi le huatnak kan ngeih khawhmi hi a si. Dawtnak tu zungzal in a hmun lai tiah Baibal nih a kan cawnpiak i huatnak tu hi cu zungzal hmunding a si rua lo. Vanram kan kai tik ahcun huatnak hi cu a dih ko lai. Asinain dawtnak cu hi vawlei kan nunchung ahhin siseh, kan thih hnu vanram kan phak tik zong ahkhin siseh a hmun ding a si (cf. 1 Kor. 13:13). Huatnak nih cun fahnak a pek. Pumsa fahnak zong a pek khawh i thinlung fahnak zong a pek khawh. Huatnak sivai tuur hi a dintuaimi a si lo. Tthennak le thisen tiang hmanh a chuahter khawh. Huatnak hi a chiatnak lei (negative meaning) in cun chim cawklo a um ko lai. Sualnak vialte he khin aa tthen khomi a si lo. Huatnak ahhin tthatnak pelpawite cu um dawh a si i (positive meaning) a ngei kho ve, sualnak huat khawh hoi hna cu a ttha lei a si ve ko. Miphun dawtnak lungthin ngeih khawh lo zong kha huat awk a simi a si.

​Huatnak muisam cu vawlei a kakmi bantuk khi a si. Dawhnak pakhat hmanh a hmu kho ti lo. Lawmhnak he cun aa hlat ngaingai. Lai phungthluk ah “Duh zoh le huat zoh ai khat,” timi kan ngei i minung lungthin a thukpi khi a pur khotu a si. Duhmi zoh kan huam tluk tein huatmi zong hi zoh huam ngai a si ve. Cohlanning tu kha ai dang tuk i a si. Baibal ah duhnung ngai in kan rel khawhmi cu “Bawi Jesuh nih dawtnak in a zoh ti te hna, dengteo in a zoh ti te hna,” kan rel khawh (cf. Marka 10:21) lengmang. Bawi Jesuh hi huatnak in an rak zoh ngai ve ko nain huatnak in a lehrul bal hna lo. Thla tu a cam piak hna (cf. Luka 23:34). Dak, dak, dak tiah tukforhnak nih huatnak in minung hawi zoh a kan fial lio ah; pawngkam zoh a kan fial lio ah Bawi Jesuh bang dawtnak in dengteo te in zoh khawh kan i zuam lai i tukforhnak cu tei khawh kan i zuam hna lai. Mah le mah cu fahnak i pe bak hlah usih, huatnak lungthin a rat sual a si ahcun “Aih, ka dua, ka mit le ka hnakhaw, ka thinlung chung in chuak ko,” tiah tthawl khawh i zuam ko hna usih. Thiang Thlarau bawmhnak he cun sual huatnak kha kan tuah khawh ve ko lai.

Laknak: Immanuel Baptist church page

Be the first to comment

Leave a Reply

Your email address will not be published.


*